អាជ្ញាធរសវនកម្មជាតិ ជាស្ថាប័នសវនកម្មកំពូល ដែលពុំធ្លាប់មានពីជំនាន់មុនៗ។ ការជំរុញឲ្យកើតជាស្ថាប័ននេះឡើង ដើម្បីរួមចំណែកក្នុងកម្មវិធីកែទម្រង់របស់រាជរដ្ឋាភិបាល សំដៅឈានទៅសម្រេចនូវគោលនយោបាយអភិបាលកិច្ចល្អ ការអភិវឌ្ឍន៍ប្រកបដោយចីរភាព សមធម៌ និងកាត់បន្ថយភាពក្រីក្រ។ ឆន្ទៈជំរុញដ៏មោះមុតនេះ បានផ្តួចផ្តើមបង្កើតឡើងដោយការប្តេជ្ញាចិត្តដ៏ខ្ពង់ខ្ពស់របស់រាជរដ្ឋាភិបាល រដ្ឋសភា និងព្រឹទ្ធសភានៅឆ្នាំ២០០១ ជាឆ្នាំទី៣ អាណត្តិទី២ នៃរាជរដ្ឋាភិបាល។
អាជ្ញាធរសវនកម្មជាតិ មានអក្សរកាត់ជាខេមរភាសា “អ.ស.ជ” ជាស្ថាប័នសាធារណៈមួយ មានភាពឯករាជ្យអំពីកិច្ចប្រតិបត្តិការនៃការងារ ហើយត្រូវបានបង្កើតដោយច្បាប់ស្តីពីសវនកម្មនៃព្រះរាជាណាចក្រកម្ពុជាដែលប្រកាសឱ្យប្រើដោយព្រះរាជក្រមលេខ ជស/រកម/០៣០០/១០ ចុះថ្ងៃទី៣០ ខែមីនា ឆ្នាំ២០០០។
តាមច្បាប់ស្តីពីសវនកម្មនៃព្រះរាជាណាចក្រកម្ពុជា អាជ្ញាធរសវនកម្មជាតិ មានបញ្ញត្តិដែលចែងលម្អិតក្នុងការពិនិត្យរបាយការណ៍ហិរញ្ញវត្ថុ និងកិច្ចប្រតិបត្តិការរបស់រាជរដ្ឋាភិបាល។ ខ្លឹមសារសង្ខេបដែលចែងដោយច្បាប់នេះ ចាប់ពីមាត្រា១៤ និងដល់១៧ បញ្ជាក់ថា អាជ្ញាធរសវនកម្មជាតិ៖
អាជ្ញាធរសវនកម្មជាតិមានសិទ្ធិអំណាចក្នុងការធ្វើសវនកម្មលើបណ្តាស្ថាប័នគ្រប់គ្រង រួមមានបណ្ដាក្រសួង ស្ថាប័ន ភា្នក់ងារ អាជ្ញាធរធនាគារជាតិ ស្ថាប័នហិរញ្ញវត្ថុរដ្ឋ និងស្ថាប័នហិរញ្ញវត្ថុរដ្ឋចំរុះឯកជន សហគ្រាសសាធារណៈ គ្រឹះស្ថានសាធារណៈ រដ្ឋបាលខេត្ដ-ក្រុង រដ្ឋបាលមូលដ្ឋាន អ្នកម៉ៅការ អ្នកផ្គត់ផ្គង់ទំនិញ និងសេវាកម្មចំពោះរាជរដ្ឋាភិបាលតាមកិច្ចសន្យា និងបណ្ដាអង្គការផ្សេងៗទៀតដែលរាជរដ្ឋាភិបាលបានផ្ដល់ជំនួយហិរញ្ញវត្ថុបន្ថែមលើទុនផ្ទាល់ និងឥណទានរួមមានទាំងការលើកលែងពន្ធអាករគ្រប់ប្រភេទ ព្រមទាំងសម្បទានផ្សេងៗទៀតទៅអង្គការដែលមិនរកប្រាក់ចំណេញ និងសហគ្រាសវិនិយោគឯកជនផង។
ស្ថាប័នសវនកម្មកំពូលនេះ មានវិសាលភាពអំណាចទូលំទូលាយក្នុងការអនុវត្តការងារសវនកម្មលើវិស័យសាធារណៈ ដែលមានខ្លឹមសារសំអាងក្នុងក្របខ័ណ្ឌនៃច្បាប់ចាប់ពីមាត្រា២២ ដល់មាត្រា២៩ ក្នុងជំពូក៥ ដែលចែងពីរបាយការណ៍នៃសវនកម្ម និងចាប់ពីមាត្រា៣០ ដល់មាត្រា៣៤ ក្នុងជំពូក៦ ដែលចែងពីសិទ្ធិអំណាចលើការប្រមូលផ្តុំព័ត៌មាន។
ក្នុងការអនុវត្តន៍ការងារកន្លងមកនេះ អាជ្ញាធរសវនកម្មជាតិសម្រេចបាននូវសមិទ្ធផលដែលជាការរួមចំណែកដល់ការធ្វើឱ្យប្រសើរឡើងនៃគោលនយោបាយកែទម្រង់របស់រាជរដ្ឋាភិបាលនៅក្នុងការគ្រប់គ្រងហិរញ្ញវត្ថុសាធារណៈ។
ជាការពិត ក្នុងទិដ្ឋភាពច្បាប់ អាជ្ញាធរសវនកម្មជាតិបានចាប់ផ្តើមបើកទំព័រប្រវត្តិសាស្ត្ររបស់ខ្លួនដោយបានរៀបចំនូវប្រព័ន្ធសកម្មភាពការងារសវនកម្មសាធារណៈ ដំបូងនាដើមឆ្នាំ២០០២។ ក្នុងកំឡុងពេលកន្លងមក ក្រៅពីកិច្ចការគ្រប់គ្រងរដ្ឋបាលទូទៅ និងការបណ្តុះបណ្តាលធនធានមនុស្ស សមិទ្ធិផលសម្រេចបានក្នុងក្របខណ្ឌជារបាយការណ៍លទ្ធផលសវនកម្ម បានបង្ហាញពីចំណុចអវិជ្ជមាន ដោយបានធ្វើឲ្យក្រសួង ស្ថាប័ន និងអង្គភាពរងសវនកម្មនានាបន្តកែលម្អ និងពង្រឹងកិច្ចប្រតិបត្តិការតាមជំនាញរៀងៗខ្លួនពីមួយឆ្នាំ ទៅមួយឆ្នាំ។ ក្រៅពីនេះ អាជ្ញាធរសវនកម្មជាតិបានកសាងនូវឯកសារគតិយុត្តិជាច្រើនទៀត ដោយមានការជួយគាំទ្រ និងកិច្ចសហការពីសំណាក់ដៃគូអភិវឌ្ឍន៍ទាំងក្នុងតំបន់ និងអន្តរជាតិ ប្រការសំខាន់គឺអាជ្ញាធរសវនកម្មជាតិបង្កើតស្តង់ដារផ្ទាល់របស់ខ្លួនសមស្របតាមច្បាប់ជាធរមាន និងសមស្របតាមស្តង់ដារអន្តរជាតិ។ សំខាន់ជាងនេះទៅទៀត អាជ្ញាធរសវនកម្មជាតិបានបង្កើតស្តង់ដារសវនកម្មសាធារណៈរបស់ខ្លួនស្របតាមច្បាប់ និងបទដ្ឋានដែលមានស្រាប់។
សមិទ្ធផលអនុវត្តការងាររបស់អាជ្ញាធរសវនកម្មជាតិជាឯកសារជំនួយស្មារតីដល់សវនករជំនាន់ក្រោយៗក៏ដូចជាក្រសួង ស្ថាប័ន និងអង្គភាពរងសវនកម្មទាំងឡាយសិក្សាស្វែងយល់ និងដកស្រង់យកបទពិសោធន៍ចំណុចល្អៗ មកប្រើប្រាស់ទៅតាមកាលៈទេសៈ និងពេលវេលាចាំបាច់ក្នុងដំណើរវិវត្តន៍ជាក់ស្តែងក្នុងក្របខណ្ឌកសាង និងអភិវឌ្ឍន៍ប្រទេសជាតិ។ ម្យ៉ាងទៀត លទ្ធផលទាំងនេះនឹងជួយសម្រួលដល់ទំនាក់ទំនងរវាងសវនករជាមួយបណ្តាអង្គភាពរងសវនកម្មឲ្យបង្កើននូវការសហការល្អ និងជិតស្និទ្ធជាបន្ថែមទៀត។ លើសពីនេះទៀត លទ្ធផលទាំងនេះ ជាធាតុផ្សំយ៉ាងសំខាន់ និងជាយុទ្ធសាស្រ្តដែលអាចជួយគាំទ្រដល់វិស័យសវនកម្មសាធារណៈនៅកម្ពុជាឲ្យពង្រឹងខ្លួនបានរឹងមាំ ដើម្បីបំពេញការងារប្រកបដោយប្រសិទ្ធភាព។
ក្នុងរយៈពេល ១០ឆ្នាំដំបូង ក្រៅពីការងារសវនកម្ម ដែលជាការងារមូលដ្ឋាន អាជ្ញាធរសវនកម្មជាតិបានខិតខំកសាង និងអនុវត្តនូវកិច្ចការផ្សេងៗ ដែលជួយគាំទ្រដល់ការងារជាមូលដ្ឋាន ដើម្បីពង្រឹង និងធានានិរន្តភាពនៃការងារដល់សា្ថប័ន។
អាជ្ញាធរសវនកម្មជាតិបានធ្វើសវនកម្មកន្លងមកតាមប្រភេទ ៖
ទន្ទឹមនេះ អាជ្ញាធរសវនកម្មជាតិ បាននិង កំពុងធ្វើសវនកម្មសាកល្បងដោយប្រើប្រាស់ព័ត៌មានវិទ្យាតាមកម្មវិធី TeamMate ដូចបណ្តាប្រទេសមួយចំនួន។ ការប្រើប្រាស់កម្មវិធីនេះ ជួយដល់សវនករអនុវត្តការងារសវនកម្មទទួលបានប្រសិទ្ធភាព និងទាន់ពេលវេលា។
ចាប់តាំងពីធ្វើសវនកម្មដំបូងនៅឆ្នាំ២០០២ ដល់ឆ្នាំ២០១១នេះ អាជ្ញាធរសវនកម្មជាតិទទួលបានលទ្ធផលសម្រេចជារបាយការណ៍សវនកម្ម សរុបចំនួន ៦៤៥ករណី ដូចមានបង្ហាញខាងក្រោម ៖
លើសពីនេះ អាជ្ញាធរសវនកម្មជាតិ បានធ្វើការផ្សព្វផ្សាយជាសាធារណៈនូវលទ្ធផលសវនកម្ម សម្រាប់ការិយបរិច្ឆេទ២០០៦ និង២០០៧ ព្រមទាំងត្រៀមរៀបចំការផ្សព្វផ្សាយរបាយការណ៍ជាសាធារណៈសម្រាប់ឆ្នាំបន្តបន្ទាប់។
ក្នុងរយៈពេល ១០ឆ្នាំកន្លងមកនេះ អាជ្ញាធរសវនកម្មជាតិបានរៀបចំឯកសារគតិយុត្តិបានមួយចំនួនស្របគ្នាជាមួយនឹងការរៀបចំផែនការយុទ្ធសាស្រ្តអភិវឌ្ឍន៍ ដើម្បីទុកជាមូលដ្ឋានសម្រាប់ដាក់ឲ្យប្រើប្រាស់ក្នុងការអនុវត្តន៍ការងារទាំងក្នុងបច្ចុប្បន្ន និងអនាគត។ ការរៀបចំឯកសារទាំងនេះ គឺឈរលើមូលដ្ឋានច្បាប់នានា និងស្តង់ដារសវនកម្មអន្តរជាតិ ដែលរួមមានខាងក្រោម ៖
ការរៀបចំលក្ខន្តិកៈដោយឡែកនេះ គឺជាការអនុវត្តន៍ឲ្យស្របតាមមាត្រា១៦ ក្នុងជំពូកទី៣ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា ដែលចែងថា “មន្រ្តីរាជការនៃអាជ្ញាធរ សវនកម្មជាតិ មានលក្ខន្តិកៈដោយឡែក” និងអនុក្រឹត្យលេខ០៩ អនក្រ ចុះថ្ងៃទី១២ ខែកុម្ភៈ ឆ្នាំ១៩៩៨ ស្តីពីការដាក់ឲ្យអនុវត្តគំរូទូទៅ លក្ខន្តិកៈដោយឡែកនៃក្របខណ្ឌ។ ការបង្កើតបាននូវលក្ខន្តិកៈដោយឡែកក្របខណ្ឌមន្រ្តីជាន់ខ្ពស់សវនកម្ម ចាត់ទុកជាឯកសារគតិយុត្តសម្រាប់គ្រប់គ្រងមន្រ្តី នៃអាជ្ញាធរសវនកម្មជាតិ។
លក្ខន្តិកៈដោយឡែកក្របខណ្ឌមន្រ្តីជាន់ខ្ពស់សវនកម្ម នៃអាជ្ញាធរសវនកម្មជាតិត្រូវបានដាក់ឲ្យអនុវត្តដោយព្រះរាជក្រឹត្យលេខ នស/រកត/០៨០៩/៨៣៩ ចុះថ្ងៃទី១៩ ខែសីហា ឆ្នាំ២០០៩។ ព្រះរាជក្រឹត្យនេះ មាន ៩ជំពូក និង២៧មាត្រា ហើយបានកំណត់ក្របខណ្ឌមន្រ្តីជាន់ខ្ពស់សវនកម្ម រួមមាន ៣ ឋានន្តរសក្តិ ៖
ដោយមានការជួយជ្រោមជ្រែងពីសំណាក់ អង្គការសហប្រតិបត្តិការអន្តរជាតិអាល្លឺម៉ង់ (GIZ) អាជ្ញាធរសវនកម្មជាតិបានដាក់ចេញនូវផែនការយុទ្ធសាស្រ្តអភិវឌ្ឍន៍ (២០០៧-២០១១) ផ្តោតសំខាន់លើការធ្វើឲ្យសម្រេច ៤ គោលបំណង ៧៧ កម្មវិធី និង ១៧៧ សកម្មភាព ដែលអាជ្ញាធរសវនកម្មជាតិ បានអនុវត្តដោយប្រុងប្រយ័ត្ន និងតាមលំដាប់លំដោយ ហើយទទួលបានជោគជ័យ និងលទ្ធផលជាផ្លែផ្កាគួរជាទីមោទនៈ។
ការរៀបចំសៀវភៅនេះ គឺជាការដកស្រង់ចេញពីឯកសារគតិយុត្តិនានា ដែលទាក់ទងដល់ការគ្រប់គ្រងមន្រ្តីរាជការស៊ីវិល ជាពិសេសស្របតាមច្បាប់ស្តីពីសហលក្ខន្តិកៈមន្រ្តីរាជការស៊ីវិល នៃព្រះរាជាណាចក្រកម្ពុជា និងបានទទួលការឧបត្ថម្ភពីសំណាក់អង្គការសហប្រតិបត្តិការអន្តរជាតិអាល្លឺម៉ង់ (GIZ)។ ចំពោះមុខ ការអនុវត្តន៍ការរៀបចំសៀវភៅនេះ សមស្របទៅតាមឯកសារគតិយុត្តិនានា ដែលទាក់ទងដល់ការគ្រប់គ្រងមន្រ្តីរាជការស៊ីវិល ដែលក្នុងអំឡុងពេលនេះ រាជរដ្ឋាភិបាលបាន និងកំពុងធ្វើបច្ចុប្បន្នភាពលើឯកសារចាស់ៗ ដើម្បីអនុវត្តបានសមស្របតាមនីតិវិធីគ្រប់គ្រងមន្រ្តីរាជការស៊ីវិលប្រកបដោយប្រសិទ្ធភាពខ្ពស់។
សៀវភៅនេះ បានផ្តួចផ្តើមរៀបចំឡើងព្រមគ្នាជាមួយសៀវភៅណែនាំការគ្រប់គ្រងធនធានមនុស្ស ដោយមានការជួយជ្រោមជ្រែងពីសំណាក់អង្គការសហប្រតិបត្តិការអន្តរជាតិអាល្លឺម៉ង់ ក្នុងគោលដៅផ្តល់នូវចំណេះដឹងថ្មីៗ និងមានប្រសិទ្ធភាពដល់មន្រ្តី អាជ្ញាធរសវនកម្មជាតិក្នុងការពង្រឹងគុណភាពសវនកម្មផង និងសម្រាប់ជាមូលដ្ឋានគ្រឹះក្នុងការរៀបចំអភិវឌ្ឍន៍ដល់ស្ថាប័ន។
ការរៀបចំគោលការណ៍ណែនាំនេះ អនុលោមតាមមាត្រា២៩ នៃច្បាប់ស្តីពីសវនកម្ម នៃព្រះរាជាណាចក្រកម្ពុជា ដែលចែងថា «របាយការណ៍ដែលធ្វើដោយអគ្គសវនករត្រូវបានចាត់ទុកជាឯកសារសាធារណៈ» និងមាត្រា៣៧ ដល់មាត្រា៣៩ ដែលចែងពី «ប្រការគួរមិនផ្សព្វផ្សាយ» ព្រមទាំងសមស្របតាមផែនការយុទ្ធសាស្រ្តអភិវឌ្ឍន៍។ គោលការណ៍ណែនាំបានបង្ហាញពីរបៀបធ្វើការផ្សព្វផ្សាយជាសាធារណៈដោយបញ្ចូលនូវចំណុចខ្វះខាតមួយចំនួនក្នុងអំឡុងពេលចុះធ្វើសវនកម្មលើការគ្រប់គ្រងរបស់បណ្តាក្រសួង-ស្ថាប័ន រដ្ឋបាលខេត្ត-ក្រុង និងរដ្ឋបាលមូលដ្ឋាន។
ក្នុងការអនុវត្តន៍ការងារសវនកម្មសាធារណៈនាពេលកន្លងមក អាជ្ញាធរសវនកម្មជាតិ ពឹងផ្អែកលើស្តង់ដារ INTOSAI ដែលជាស្តង់ដារសវនកម្មសាធារណៈ សម្រាប់បណ្តាប្រទេសលើពិភពលោក។ នៅឆ្នាំ២០១១នេះ យើងបានរៀបចំចងក្រងជាស្តង់ដារសវនកម្មសាធារណៈឡើង ដើម្បីឲ្យការធ្វើសវនកម្មកាន់តែមានប្រសិទ្ធភាពខ្ពស់ ហើយឯកសារនេះចាត់ទុកជាមូលដ្ឋានគ្រឹះសម្រាប់ជំនាញសវនកម្មសាធារណៈនៅព្រះរាជាណាចក្រកម្ពុជា។
ក្នុងរយៈពេល ១០ឆ្នាំនេះ ក្រៅពីការងារសវនកម្ម អាជ្ញាធរសវនកម្មជាតិបានរៀបចំ និងចងក្រងជាឯកសារស្រាវជ្រាវពាក់ព័ន្ធជំនាញសវនកម្មមួយចំនួន រួមមាន ៖
ជាមួយនេះ អាជ្ញាធរសវនកម្មជាតិ កំពុងបន្តរៀបចំគោលការណ៍ណែនាំការធ្វើសវនកម្មសំខាន់ៗ មួយចំនួនទៀត រួមមាន៖
ដោយមានកិច្ចសហការពីដៃគូអភិវឌ្ឍន៍ អាជ្ញាធរសនវកម្មជាតិបានយកចិត្តទុកដាក់រៀបចំលើផ្នែកព័ត៌មានវិទ្យា ដែលជាការងារយ៉ាងសំខាន់សម្រាប់ការអភិវឌ្ឍន៍ការងារសវនកម្ម ក្នុងនោះ រួមមាន ៖
អាជ្ញាធរសវនកមុ្មជាតិ បានបង្កើតបណ្ណាល័យតាំងពីឆ្នាំ២០០៣ ដោយបានស្រាវជ្រាវ និងថែរក្សាសៀវភៅ និងឯកសារសំខាន់ៗជាច្រើន ដើម្បីទុកឲ្យសវនករ និងមន្រ្តីជំនាញដទៃទៀត ចូលសិក្សាស្រាវជ្រាវ និងស្វែងយល់អំពីសមិទ្ធផលសវនកម្មតាមបណ្តាឆ្នាំនីមួយៗ។
ក្នុងរយៈពេល ១០ឆ្នាំនេះ អាជ្ញាធរសវនកម្មជាតិបានរៀបចំបណ្តុះបណ្តាលនៅក្នុងប្រទេស ចំនួន ៨១វគ្គ និងបញ្ជូនមន្រ្តីទៅចូលរួមវគ្គបណ្តុះបណ្តាលនៅក្រៅប្រទេស ចំនួន ៧២វគ្គ។
ការងារសហប្រតិបត្តិការ ជាមួយស្ថាប័នថ្នាក់ជាតិ ក៏ដូចជាមួយថ្នាក់អន្តរជាតិ គឺជាយុទ្ធសាស្រ្តដ៏សំខាន់មួយនៃផ្នែកគាំទ្រ ក្នុងន័យជំរុញឲ្យការងារអនុវត្តលើគ្រប់ផ្នែក នៃកិច្ចប្រតិបត្តិការ សវនកម្មទទួលបានប្រសិទ្ធភាពខ្ពស់ និងមានការអភិវឌ្ឍន៍ឈានឡើងស្របជាមួយគោលនយោបាយ និងកម្មវិធីកែទម្រង់លើគ្រប់វិស័យរបស់រាជរដ្ឋាភិបាលផង និងស្របជាមួយដំណើរអភិវឌ្ឍន៍ឥតឈប់ឈរពីមួយថ្ងៃទៅមួយថ្ងៃរបស់ស្ថាប័នសវនកម្មកំពូលនានា ទាំងនៅក្នុងតំបន់ និងនៅលើសាកលលោក។
ចំពោះកិច្ចសហប្រតិបត្តិការជាមួយស្ថាប័នថ្នាក់ជាតិដូចជាស្ថាប័ននីតិប្បញ្ញត្តិ និងនីតិប្រតិបត្តិ អាជ្ញាធរសវនកម្មជាតិ បានចូលរួមប្រជុំនានាជាមួយតំណាងរាជរដ្ឋាភិបាល រដ្ឋសភា និងព្រឹទ្ធសភាទាក់ទងដល់វិស័យសវនកម្ម សេដ្ឋកិច្ចជាតិ និងហិរញ្ញវត្ថុសាធារណៈ។
គួរបញ្ជាក់ផងដែរ នៅក្នុងកិច្ចសហប្រតិបត្តិការជាមួយស្ថាប័នអន្ដរជាតិ អាជ្ញាធរសវនកម្មជាតិបានសហការយ៉ាងជិតស្និទ្ធជាមួយបណ្តាដៃគូអភិវឌ្ឍន៍អន្តរជាតិក្នុងតំបន់ និងស្ថាប័នសវនកម្មកំពូលអន្តរជាតិនានាទៀតក្នុងការលើកកំពស់គុណភាពសវនកម្មសាធារណៈដោយការចូលរួមសិក្ខាសាលាថ្នាក់អន្ដរជាតិជាច្រើន និងការចុះកិច្ចព្រមព្រៀងអនុស្សរណៈនៃការយោគយល់គ្នា (MoU) ជាមួយនឹងស្ថាប័នសវនកម្មកំពូលផ្សេងទៀតនៅក្នុងតំបន់ដូចជា ស្ថាប័នសវនកម្មកំពូលនៃសាធារណរដ្ឋប្រជាមានិតចិននៅឆ្នាំ២០០៧ ស្ថាប័នសវនកម្មកំពូលនៃសាធារណរដ្ឋសង្គមនិយមវៀតណាមនៅឆ្នាំ២០០៨ ស្ថាប័នសវនកម្មកំពូលនៃសាធារណរដ្ឋប្រជាធិបតេយ្យប្រជាមានិតឡាវនៅឆ្នាំ២០០៩ ស្ថាប័នសវនកម្មកំពូលនៃប្រទេសនូវែលហ្សឺឡង់នៅឆ្នាំ២០០៩ ស្ថាប័នសវនកម្មកំពូលនៃសាធារណរដ្ឋឥណ្ឌូនេស៊ីនៅឆ្នាំ២០១០ ស្ថាប័នសវនកម្មកំពូលនៃសាធារណរដ្ឋឥណ្ឌានៅឆ្នាំ២០១០ ស្ថាប័នសវនកម្មជាតិនៃប្រទេសស៊ុយអ៊ែតនៅឆ្នាំ២០១១។
អាជ្ញាធរសវនកម្មជាតិបានចូលជាសមាជិកអង្គការអន្តរជាតិ នៃស្ថាប័នសវនកម្មកំពូល (INTOSAI) នៅក្នុងខែធ្នូ ឆ្នាំ២០០២ ដែលបច្ចុប្បន្នមានសមាជិកសរុបចំនួន ១៨៩ប្រទេស។ នៅក្នុងខែមីនា ឆ្នាំ២០០៤ អាជ្ញាធរសវនកម្មជាតិបានចូលជាសមាជិកអង្គការអាស៊ី នៃស្ថាប័នសវនកម្មកំពូល (ASOSAI) បច្ចុប្បន្នមានសមាជិកសរុបចំនួន ៤៥ប្រទេស។
ការចូលជាសមាជិកអង្គការអន្តរជាតិ នៃស្ថាប័នសវនកម្មកំពូល និងអាស៊ី ផ្តើមចេញពីការប្រមូលផ្តុំ នៃស្ថាប័នសវនកម្មកំពូលតាមបណ្តាប្រទេស សំដៅពង្រឹងគោលការណ៍សវនកម្ម ស្តង់ដារសវនកម្ម និងផ្តល់នូវបទពិសោធន៍តាមរយៈការបំពេញទស្សនកិច្ចសិក្សា ការបណ្តុះបណ្តាល និងកិច្ចសហប្រតិបត្តិការនានា លើវិស័យសវនកម្មផ្ទៃក្រៅ ដើម្បីរួមចំណែកថែរក្សានូវសុវត្ថិភាពការងារជំនាញឲ្យសមស្របតាមកម្រិតស្តង់ដារអន្តរជាតិ។
ជាមួយនេះ អាជ្ញាធរសវនកម្មជាតិបានចូលជាសមាជិកក្រុមការងារបច្ចេកទេស នៃការធ្វើសវនកម្មតាមប្រព័ន្ធព័ត៌មានវិទ្យា (Working Group on IT Audit) នៃអង្គការ INTOSAI និងចូលជាសមាជិកក្រុមការងារបច្ចេកទេស នៃការចងក្រងឯកសារស្តីពីតម្លៃ និងអត្ថប្រយោជន៍របស់បណ្តាស្ថាប័នសវនកម្មកំពូលនានា (Working Group in Value and Benefit of SAIs) នៃអង្គការ INTOSAI។
នៅឆ្នាំបន្ទាប់ អាជ្ញាធរសវនកម្មជាតិ មានបំណង ៖
ជាមួយនឹងការគាំទ្រពីស្ថាប័នសវនកម្មកំពូលដទៃទៀត និងដៃគូអភិវឌ្ឍន៍ អាជ្ញាធរសវនកម្មជាតិ នឹងសម្រេចគោលការណ៍ណែនាំ និងសៀវភៅណែនាំដែលត្រូវការសម្រាប់ការងារសវនកម្មមួយដ៏មានប្រសិទ្ធិផលដូចជា គោលការណ៍ណែនាំសវនកម្មលើការអនុលោមតាម គោលការណ៍ណែនាំសវនកម្មលើរបាយការណ៍ហិរញ្ញវត្ថុ និងគោលការណ៍ណែនាំសវនកម្មលើកិច្ចប្រតិបត្តិការ។ អាជ្ញាធរសវនកម្មជាតិ នឹងបន្តក្នុងដំណាក់កាលអនុវត្តសៀវភៅណែនាំការគ្រប់គ្រងធនធានមនុស្សនៅក្នុងការងារប្រចាំថ្ងៃ និងធ្វើអោយប្រសើរឡើងនូវប្រព័ន្ធគ្រប់គ្រងទិន្នន័យអំពីអង្គភាពរងសវនកម្ម និងអំពីការតាមដានការអនុវត្តន៍អនុសាសន៍សវនកម្ម។ លើសពីនេះទៅទៀត អាជ្ញាធរសវនកម្មជាតិ នឹងព្យាយាមបង្កើនល្បឿនការងារសវនកម្ម និងអភិវឌ្ឍវិធីសាស្រ្តដើម្បីបង្កើនប្រសិទ្ធភាពនៃការងារសវនកម្មរបស់ខ្លួន។ ជាចុងក្រោយ អាជ្ញាធរសវនកម្មជាតិ នឹងត្រូវបានពង្រឹងដោយបង្កើតមជ្ឈមណ្ឌលទុកដាក់ឯកសារ និងដោយសម្រេចប្រព័ន្ធព័ត៌មានវិទ្យា រួមទាំងឧបករណ៍ទំនាក់ទំនងផ្ទៃក្នុង (អ៊ីនត្រាណែត)។
គោលបំណងនៃកិច្ចខិតខំប្រឹងប្រែងរបស់អាជ្ញាធរសវនកម្មជាតិ និងដៃគូអភិវឌ្ឍន៍របស់ខ្លួនគឺដើម្បីធ្វើអោយអាជ្ញាធរសវនកម្មជាតិទៅជាស្ថាប័នសវនកម្មកំពូលល្បីឈ្មោះ និងក្លាយទៅជាដៃគូដ៏មានប្រសិទ្ធិផលរបស់រដ្ឋសភា និងព្រឹទ្ធសភា និងរាជរដ្ឋាភិបាលក្នុងការធ្វើឱ្យប្រសើរឡើងនូវលក្ខខណ្ឌជីវភាពរបស់ប្រជាពលរដ្ឋនៃព្រះរាជាណាចក្រកម្ពុជា។
English