ការបង្កើតអាជ្ញាធរសវនកម្មជាតិ មានគោលបំណងដើម្បីបំពេញមុខងារជាស្ថាប័នសវនកម្មកំពូលដែលឯករាជ្យអំពីកិច្ចប្រតិបត្តិការ និងទទួលខុសត្រូវក្នុងការអនុវត្តន៍មុខងារសវនកម្មផ្ទៃក្រៅរបស់រាជរដ្ឋាភិបាល រួមមានសវនកម្មលើរបាយការណ៍ហិរញ្ញវត្ថុ សវនកម្មលើកិច្ចប្រតិបត្តិការ និងសវនកម្មលើការអនុលោមតាមច្បាប់។ លទ្ធផលរបាយការណ៍សវនកម្មត្រូវផ្ញើជូនរដ្ឋសភា ព្រឹទ្ធសភា និងចម្លងជូនទៅរាជរដ្ឋាភិបាល និងស្ថាប័នពាក់ព័ន្ធដើម្បីបានជ្រាប ក្នុងគោលដៅជំរុញឲ្យមានការកែលម្អប្រព័ន្ធគ្រប់គ្រងទាំងឡាយ ដែលនៅមានចំណុចខ្វះខាត ឬមានភាពមិនប្រក្រតីក្នុងកិច្ចប្រតិបត្តិការរបស់ខ្លួន។
ក្នុងការធ្វើឲ្យសម្រេចបាននូវការធ្វើសវនកម្មប្រកបដោយគុណភាព អាជ្ញាធរសវនកម្មជាតិបានបង្កើតផែនការយុទ្ធសាស្ត្រអភិវឌ្ឍន៍ ២០០៧-២០១១ ផែនការយុទ្ធសាស្រ្តអភិវឌ្ឍន៍ ២០១២-២០១៦ និងផែនការយុទ្ធសាស្រ្តអភិវឌ្ឍន៍ ២០១៦-២០២១ ដោយបានកំណត់នូវទស្សនវិស័យ បេសកកម្ម និងតម្លៃរបស់អាជ្ញាធរសវនកម្មជាតិ ដូចខាងក្រោម ៖
ជួយរាជរដ្ឋាភិបាលគ្រប់គ្រងធនធានសាធារណៈដោយម៉ត់ចត់ និងជួយលើការទទួលខុសត្រូវផែ្នកសាធារណៈ តាមរយៈការធ្វើសវនកម្ម ប្រកបដោយគុណភាព ទាន់ពេលវេលា និងជឿទុកចិត្ត។
ធ្វើសវនកម្មផ្ទៃក្រៅរបស់រាជរដ្ឋាភិបាលប្រកបដោយឯករាជ្យភាព និងសមត្ថភាពវិជ្ជាជីវៈខ្ពស់ ដើម្បីសម្រេចបាននូវលទ្ធផលសវនកម្មប្រកបដោយគុណភាព ទាន់ពេលវេលា និងជឿទុកចិត្ត។
សវនកម្មប្រកបដោយគុណភាព បង្កើនគណនេយ្យភាព អភិបាលកិច្ចល្អ និងជឿទុកចិត្ដ។
English