ពិធី​ចែក​វិញ្ញាបនប័ត្រ​ដល់​អ្នក​សម្រប​សម្រួល​ស្តង់ដារ​សវនកម្ម​អន្តរជាតិ

ពិធីចែកវិញ្ញាបនប័ត្រដល់អ្នកសម្របសម្រួលស្តង់ដារសវនកម្មអន្តរជាតិ

លោកជំទាវ សោម គីមសួគ៌ អគ្គសវនករ នៃអាជ្ញាធរសវនកម្មជាតិ បានអញ្ជើញជាអធិបតីក្នុងពិធីចែកវិញ្ញាបនប័ត្រអ្នកសម្របសម្រួលស្តង់ដារសវនកម្មអន្តរជាតិ (Certificate ISSAI facilitators) ជូនមន្ត្រីសវនកម្មជាតិចំនួន ៣រូប នាថ្ងៃទី១៥ ខែមករា ឆ្នាំ២០១៤ នៅខុទ្ទកាល័យអគ្គសវនករ នៃអាជ្ញាធរសវនកម្មជាតិ ដោយមានការចូលរួមពី អគ្គលេខាធិការ អគ្គលេខាធិការរង និងប្រធាននាយកដ្ឋាន។

មន្ត្រីដែលបានទទួលវិញ្ញាបនប័ត្រនេះរួមមាន លោក ហ៊ូវ តារា (អ្នកសម្របសម្រួលការអនុវត្តន៍ស្តង់ដារ ISSAIs សម្រាប់សវនកម្មលើកិច្ចប្រតិបត្តិការ) កញ្ញា គង់ លក្ខិណា និងលោកស្រី ហេង បូធីតា (អ្នកសម្របសម្រួលការអនុវត្តន៍ស្តង់ដារ ISSAIs សម្រាប់សវនកម្មលើរបាយការណ៍ហិរញ្ញវត្ថុ)។

លោកជំទាវ សោម គីមសួគ៌ អគ្គសវនករ នៃអាជ្ញាធរសវនកម្មជាតិ បានមានប្រសាសន៍ថា ការបណ្តុះបណ្តាលនេះបានផ្តល់នូវចំណេះដឹង និងជំនាញសវនកម្មដល់សិក្ខាកាម។ ដូច្នេះ ការងារនេះជាសសរស្តម្ភនៃស្តង់ដារ ISSAIs ក្នុងការអនុវត្តន៍សវនកម្មប្រកបដោយប្រសិទ្ធភាព និងប្រសិទ្ធផល។

លោកជំទាវ ក៏បានរំពឹងទុកដែរថា មន្ត្រីនៃអាជ្ញាធរសវនកម្មជាតិនឹងបានចូលរួមវគ្គបណ្តុះបណ្តាលកាន់តែច្រើនឡើងនាពេលអនាគត។ មុននឹងទទួលបានវិញ្ញាបនប័ត្រនេះ សិក្ខាកាមបានបញ្ចប់ការបណ្តុះបណ្តាលដោយជោគជ័យ នៃកម្មវិធី 3i របស់ស្តង់ដារ ISSAIs ក្នុងនោះមានការបណ្តុះបណ្តាលចំនួន ២ វគ្គ និងសិក្ខាសាលា ១ វគ្គ ដូចខាងក្រោម ៖

វគ្គសិក្សាតាមប្រព័ន្ធអេឡិចត្រូនិច (e-learning) លើកទី ១ បានធ្វើឡើងនៅក្នុងឆ្នាំ២០១២ មានរយៈពេល ៧ សប្តាហ៍។ វគ្គសិក្សាតាមប្រព័ន្ធអេឡិចត្រូនិច មានវិធីសាស្ត្រជាច្រើនដូចជា ការជជែកដោយផ្ទាល់ (Live Chat) ការពន្យល់ជាសម្លេងដោយមានបង្ហាញមេរៀន (Webinar) កំណត់ត្រាចែករំលែកព័ត៌មាន (Blog) បណ្ណាល័យអេឡិចត្រូនិច (e-library) សន្និសីទតាមបណ្តាញអ៊ីនធឺណេត (Virtual Conference) ការប្រជុំពិភាក្សាអនឡាញ និងអ៊ិនត្រាណេតផ្ទៃក្នុងជាដើម។ ក្នុងនោះ សិក្ខាកាមក៍បានចូលរួមក្នុងការដាក់សំណួរពិភាក្សា ករណីសិក្សា និងការធ្វើតេស្ត។
វគ្គសិក្សាតាមប្រព័ន្ធអេឡិចត្រូនិច (e-learning) លើកទី ២ បានធ្វើឡើងនៅក្នុងឆ្នាំ២០១៣ មានរយៈពេល ៧ សប្តាហ៍។
សិក្ខាសាលាបានរៀបចំឡើងនៅទីក្រុងបាងកក ប្រទេសថៃ ដែលមានរយៈពេល ៦ ថ្ងៃ ចាប់ពីថ្ងៃទី០៧ ដល់ថ្ងៃទី១២ ខែតុលា ឆ្នាំ២០១៣។ សិក្ខាកាមដែលបានចូលរួម មានចំនួនសរុប ៣៦ រូប មកពីស្ថាប័នសវនកម្មកំពូល (SAI) ចំនួន ២០ នៅក្នុងតំបន់អាស៊ី និងអាស៊ីប៉ាស៊ីហ្វិក។ គោលបំណងនៃសិក្ខាសាលានេះ គឺដើម្បីបណ្តុះបណ្តាលសិក្ខាកាមអោយក្លាយជាអ្នកសម្របសម្រួលរបស់ SAI ដែលជាប្រទេសកំពុងអភិវឌ្ឍន៍ក្នុងការអនុវត្តន៍ស្តង់ដារ ISSAIs។

កញ្ញា គង់ លក្ខិណា តំណាងសិក្ខាកាម បានធ្វើការប្តេជ្ញាចិត្តក្នុងការអនុវត្តន៍តួនាទីជាអ្នកសម្របសម្រួលការអនុវត្តន៍ស្តង់ដារ ISSAIs។

គួរបញ្ជាក់ផងដែរថា អ្នកសម្របសម្រួលគឺជាអ្នកទ្រទ្រង់ការអនុវត្តន៍ស្តង់ដារ ISSAIs ដែលមានតួនាទីបង្កើនការយល់ដឹងអំពីស្តង់ដារ ISSAI ផ្តល់យោបល់ដល់ថ្នាក់ដឹកនាំ និងបង្កើតនូវគំនិតផ្តួចផ្តើមផ្សេងៗដើម្បីផ្សព្វផ្សាយអំពីស្តង់ដារ ISSAIs ដល់អ្នកដែលពាក់ព័ន្ធ តាមរយៈការចែករំលែកព័ត៌មានស្តីពីស្តង់ដារនៅលើគេហទំព័ររបស់ស្ថាប័ន ទិន្នានុលេខន៍ ការពិភាក្សា ឬប័ណ្ណប្រកាស ជាដើម។ អ្នកសម្របសម្រួលក៏មានតួនាទីចូលរួមបង្កើតយុទ្ធសាស្ត្រសម្រាប់ គម្រោងអនុវត្តស្តង់ដារ ISSAIs ផងដែរ។