មហាសន្និបាតរបស់អង្គការអាស៊ីនៃស្ថាប័នសវនកម្មកំពូល(ASOSAI)លើកទី១៥និង សន្និសីទជំនាញASOSAIលើកទី៨តាមប្រព័ន្ធវីដេអូ

ថ្ងៃអង្គារ ១កើត ខែភទ្របទ ឆ្នាំឆ្លូវ ត្រីស័ក ព.ស. ២៥៦៥ ត្រូវនឹង ថ្ងៃទី៧ ខែកញ្ញា ឆ្នាំ២០២១ តបតាមការអញ្ជើញរបស់ឯកឧត្តម Prajuck Boonyoung អគ្គសវនករ នៃស្ថាប័នសវនកម្មរដ្ឋនៃព្រះរាជាណាចក្រថៃ លោកជំទាវ បណ្ឌិត សោម គីមសួគ៌ អគ្គសវនករនៃអាជ្ញាធរសវនកម្មជាតិបានដឹកនាំគណៈប្រតិភូអាជ្ញាធរសវនកម្មជាតិចូលរួមកិច្ចប្រជុំមហាសន្និបាតរបស់អង្គការអាស៊ីនៃស្ថាប័នសវនកម្មកំពូល (ASOSAI) លើកទី១៥ និងសន្និសីទជំនាញ ASOSAI លើកទី៨ តាមរយៈប្រព័ន្ធវីដេអូ ចាប់ពីថ្ងៃទី៧ ដល់ថ្ងៃទី៨ ខែកញ្ញា ឆ្នាំ២០២១។
មហាសន្និបាតលើកទី១៥ នេះមានការចូលរួមពីគណៈប្រតិភូជាន់ខ្ពស់នៃស្ថាប័នសវនកម្មកំពូលនៃបណ្តាប្រទេសចំនួន ៤៣ ដែលជាសមាជិករបស់ ASOSAI និងអង្គការអន្តរជាតិជាដៃគូរបស់ ASOSAI ចំនួន ០៣ ។
មហាសន្និបាតគឺជាអង្គការចាត់តាំងកំពូលរបស់ ASOSAI ដែលប្រារឰធ្វើឡើងរៀងរាល់៣ឆ្នាំម្ដង និងមានការចូលរួមពីបណ្ដាប្រទេសដែលជាសមាជិករបស់ASOSAI និងតំណាងរបស់ស្ថាប័នអន្តរជាតិនានា។ គោលបំណងនៃមហាសន្និបាត គឺដើម្បីផ្ដល់ឱកាសដល់សមាជិកទាំងអស់ក្នុងការចែករំលែកនូវបទពិសោធន៍ ការពិភាក្សាទៅលើបញ្ហាជាក់លាក់ណាមួយ និងការអនុម័តទៅលើសេចក្ដីសម្រេចចិត្ដ និងអនុសាសន៍នានា។
សូមជម្រាបជូនថា ASOSAI ត្រូវបានបង្កើតឡើងក្នុងឆ្នាំ១៩៧៩ ជាសហគមន៍តំបន់មួយរបស់អង្គការអន្តរជាតិនៃស្ថាប័នសវនកម្មកំពូល (INTOSAI) ដែលមកដល់បច្ចុប្បន្ននេះ ASOSAI មានសមាជិកជាស្ថាប័នសវនកម្មកំពូល (SAI) សរុបចំនួន ៤៧។ អាជ្ញាធរសវនកម្មជាតិបានចូលជាសមាជិករបស់ ASOSAI នៅក្នុងខែមីនា ឆ្នាំ២០០៤។
បន្ទាប់ពីសុន្ទរកថាបើក និងសុន្ទរកថាគន្លឹះរួចមក មហាសន្និបាតលើកទី១៥ បានដំណើរការទៅតាមរបៀបវារៈ និងអនុម័តលើរបាយការណ៍ និងលទ្ធផលការងារដូចខាងក្រោម៖
(១) របាយការណ៍សកម្មភាពរបស់លេខាធិការដ្ឋានចាប់ពីមហាសន្និបាតលើកទី១៤
(២) របាយការណ៍ហិរញ្ញវត្ថុរបស់ ASOSAI សម្រាប់ឆ្នាំ២០១៨-២០២០ និងលទ្ធផលសវនកម្មផ្ទៃក្រៅរបស់គណៈកម្មាធិការសវនកម្មលើរបាយការណ៍ហិរញ្ញវត្ថុសម្រាប់ឆ្នាំ២០១៨-២០២០
(៣) ថវិកា ASOSAI សម្រាប់ឆ្នាំ២០២២ ដល់ឆ្នាំ២០២៤
(៤) របាយការណ៍ស្តីពីការអនុវត្តផែនការយុទ្ធសាស្រ្តរបស់ASOSAI និងផែនការយុទ្ធសាស្រ្តឆ្នាំ២០២២ ដល់ឆ្នាំ២០២៧
(៥) របាយការណ៍ស្តីពីសកម្មភាពការអភិវឌ្ឍសមត្ថភាពរបស់ASOSAI ពីឆ្នាំ២០១៨ ដល់ឆ្នាំ២០២១
(៦) របាយការណ៍ស្តីពីលទ្ធផលនៃសេចក្តីប្រកាសទីក្រុងហាណូយ
(៧) របាយការណ៍ស្តីពីលទ្ធផលគម្រោងស្រាវជ្រាវលើកទី១២ របស់ ASOSAI
(៨) របាយការណ៍ស្តីពីព្រឹត្តិបត្រព័ត៌មានរបស់ ASOSAI
(៩) របាយការណ៍ស្តីពីកិច្ចសហប្រតិបត្តិការរវាង ASOSAI និងអង្គការអឺរ៉ុបនៃស្ថាប័នសវនកម្មកំពូល (EUROSAI)
(១០)របាយការណ៍របស់ក្រុមការងារ ASOSAI ស្តីពីសវនកម្មលើបរិស្ថាន
(១១)ការបង្កើតក្រុមការងារ ASOSAI ស្តីពីគោលដៅអភិវឌ្ឍន៍ប្រកបដោយចីរភាព (SDGs)
(១២)ការបង្កើតក្រុមការងារASOSAIស្តីពីសវនកម្មលើការគ្រប់គ្រងវិបត្តិ (Crisis Management Audit)
(១៣)របាយការណ៍ស្តីពីជំនួយរបស់ ASOSAI ជូនដល់ SAI ជាសមាជិកដែលរងផលប៉ះពាល់ដោយជំងឺកូវីដ១៩
(១៤)ការអនុម័តឱ្យការិយាល័យអគ្គត្រួតពិនិត្យ និងអគ្គសវនករនៃសាធារណរដ្ឋឥណ្ឌា (SAI-India)ជាម្ចាស់ផ្ទះរៀបចំមហាសន្និបាតរបស់ ASOSAI លើកទី១៦ នាឆ្នាំ២០២៤
(១៥)ការអនុម័តឱ្យការិយាល័យសវនកម្មជាតិនៃសាធារណរដ្ឋប្រជាមានិតចិន (SAI-China) ជាអគ្គលេខាធិការសម្រាប់ឆ្នាំ២០២១ ដល់ឆ្នាំ២០២៤
(១៦) ក្រុមប្រឹក្សាភិបាលសម្រាប់អាណត្តិឆ្នាំ២០២១ ដល់ឆ្នាំ២០២៤ រួមមាន ស្ថាប័នសវនកម្មកំពូលនៃប្រទេសថៃ (ប្រធាន) ចិន (អគ្គលេខាធិការ) វៀតណាម ឥណ្ឌា ជប៉ុន សាធារណរដ្ឋកូរ៉េ ម៉ាឡេស៊ី ប៉ាគីស្ថាន ហ្វីលីពីន រុស្សី តួកគី និងអារ៉ាប៊ីតសាអូឌីត
(១៧)គណៈកម្មាធិការសវនកម្មសម្រាប់ឆ្នាំ២០២១-២០២៤ រួមមាន ស្ថាប័នសវនកម្មកំពូលនៃប្រទេសអាស៊ែបៃហ្សង់ និងកាហ្សាក់ស្ថាន។
ជាមួយគ្នានេះ សន្និសីទជំនាញASOSAI លើកទី៨ ត្រូវបានរៀបចំក្រោមប្រធានបទ “ ASOSAI និងគន្លងប្រក្រតីភាពបន្ទាប់ (The ASOSAI and the Next Normal) ស្តីពីភាពធន់ក្នុងពេលមានបញ្ហាប្រឈម” ដើម្បីធ្វើការចែករំលែកចំណេះដឹង បទពិសោធន៍ ទស្សនៈវិស័យ និងឧត្តមានុវត្តន៍ក្នុងចំណោមសហគមន៍ SAIs។
មហាសន្និបាត ASOSAI លើកទី១៥ បានឯកភាពដាក់ចេញនូវសេចក្តីថ្លែងការណ៍ទីក្រុងបាងកក ឆ្នាំ២០២១៖ “SAIs និងការត្រៀមលក្ខណៈសម្រាប់គន្លងប្រក្រតីភាពបន្ទាប់”។ សេចក្តីថ្លែងការណ៍ទីក្រុងបាងកកនេះត្រូវបានរៀបចំឡើងដោយផ្អែកលើមូលដ្ឋានឯកសារសេចក្តីថ្លែងការណ៍អន្តរជាតិចាំបាច់ចំនួន ០៥ (សេចក្តីថ្លែងការណ៍ទីក្រុងលីម៉ាឆ្នាំ១៩៧៧ សេចក្តីថ្លែងការណ៍ទីក្រុងប៉េកាំងឆ្នាំ២០១៣ សេចក្តីថ្លែងការណ៍ទីក្រុងអាប៊ូដាប៊ីឆ្នាំ២០១៦ សេចក្តីថ្លែងការណ៍ទីក្រុងហាណូយឆ្នាំ២០១៨ និងសេចក្តីថ្លែងការណ៍ទីក្រុងម៉ូស្គូឆ្នាំ២០១៩)។ សេចក្តីថ្លែងការណ៍ទីក្រុងបាងកកឆ្នាំ២០២១ រួមមាន ៤ ជំពូក៖

ជំពូកទី១៖ SAIs និងការជំរុញអភិបាលកិច្ចល្អនៅក្នុងគន្លងប្រក្រតីភាពបន្ទាប់
ជំពូកទី២៖ SAIs និងការលើកទឹកចិត្ត ដើម្បីឱ្យសម្រេចបានSDGs
ជំពូកទី៣៖ SAIs និងការទាញយកការប្រើប្រាស់បច្ចេកវិទ្យាទំនើបសម្រាប់ការងារសវនកម្មលើវិស័យសាធារណៈ និង
ជំពូកទី៤៖ SAIs និងការឆ្លើយតបចំពោះបញ្ហាគ្រោះមហន្តរាយ និងការរីករាលដាលជំងឺឆ្លង។

ជាចុងក្រោយ មហាសន្និបាតបានវាយតម្លៃខ្ពស់ចំពោះស្ថាប័នសវនកម្មរដ្ឋនៃព្រះរាជាណាចក្រថៃ ដែលបានធ្វើជាម្ចាស់ផ្ទះរៀបចំមហាសន្និបាតរបស់ ASOSAI លើកទី១៥ និងសន្និសីទជំនាញ ASOSAI លើកទី៨ តាមរយៈប្រព័ន្ធវីដេអូ ប្រកបដោយជោគជ័យ។